Жақсыны көрмекке. Қазақстанда шетелдік туристердің ағыны артып келеді. EQonaq ақпараттық жүйесінің деректеріне сәйкес, жыл басынан ел аумағына сырт мемлекеттерден 200 мыңға жуық саяхатшы келген. Негізінен көршілес Ресей мен Өзбекстан, сондай-ақ Түркия мен Қытай азаматтары. Алыс шетел туристері Ұлы даланың кереметтерін көруге асық. Қонақтар елмен етене танысуды елорда мен Алматы қалаларынан бастағанды жөн көреді. Олар біздегі ескі мен заманауи сәулеттің үйлесім тапқан жарасымды кейпіне тәнті. Көбіне көнеден тамыр тартқан тарихи ескерткіштерді қызықтап, қасиетті мекендерді аралауды қалайды. Келушілер саны бойынша Қызылорда және Маңғыстау өңірлері де көш басында.
Даниел Сержанұлы, «Kazakh Tourism» ҰК Басқарушы директоры:
– eQonaq жүйесі жалпы туристердің санын есептеу үшін және олар бойынша статистикалық ақпарат жинау үшін енгізілген жүйе. Жалпы ол ең басында шетелден келетін туристерді миграциялық есепке алу үшін жасалған. Біз одан басқа туристің нағыз портретін жасаймыз, кім екенін, жасы қаншада, қай жерге баратынын, бірінші рет келіп жатыр әлде қайтып келді ме, қандай географиялық жерлерге барғысы келеді деген ақпаратты дәл қазіргі осы уақытта көруге мүмкіншілік береді.
Айта кетейік, eQonaq ақпараттық жүйесі 2020 жылдың қараша айында іске қосылды. Қазіргі уақытта ол республикалық маңызы бар 3 қала мен 14 облыс орталығын қамтиды.
