Мемлекет басшысы Самарқандта бірқатар кездесу өткізді

Самарқандтағы «Орталық Азия – Еуропа Одағы» саммиті аясында Қасым-Жомарт Тоқаев Еуропалық Кеңес Президенті Антониу Коштамен кездесті. Тараптар ынтымақтастықты нығайту мәселелерін қарады. Еуропа Одағы - Қазақстанның ірі сауда серіктесі әрі инвесторы. Елімізге шетелден тартылған инвестицияның 40 пайыздан астамы осы ұйымға тиесілі. Былтыр Одақ арасындағы тауар айналым 50 миллиард долларға жуықтады. Бұл - Еуропа Одағы мен Орталық Азия елдері арасындағы сауда-саттықтың 80 пайызы. Мемлекет басшысы Еуропалық комиссия Президенті Урсула фон дер Ляйенмен де кездесті. Қасым-жомарт Тоқаев Қазақстанның Еуропамен ынтымақтастығын одан әрі тереңдететін төрт басым бағытты атады. Бұл – энергетика, ірі инфрақұрылым, көлік-логистика, сондай-ақ цифрлық инновация бағытындағы серіктестік. Тараптар Қазақстан мен Еуропалық комиссия арасында виза беру тәртібін жеңілдету жөніндегі келісімге келу үдерісі басталғанын оң бағалады. Урсула фон дер Ляйен Қасым-Жомарт Тоқаевты елімізде сирек кездесетін металдардың ірі кен орнының табылуымен құттықтады. Қасым-Жомарт Тоқаев Еуропалық қайта құру және даму банкінің президенті Одиль Рено-Бассомен кездесті. Ол Президентке «жасыл экономика» бағдарламаларын жүзеге асыру туралы айтты. Бастамаға қаржы ұйымы 2 миллиард еуро инвестиция құюды жоспарлап отыр. Мемлекет басшысы Өзбекстан Президенті Шавкат Мирзиёевпен кездесті. Қасым-Жомарт Тоқаев «Орталық Азия – Еуропа Одағы» саммиті аймақ елдерінің Еуропа Одағымен диалогын ілгерілетуге ықпал ететініне сенім білдірді. Мемлекет басшылары екі ел ынтымақтастығы қарқынды дамып келе жатқанын айтты.

Веб-редактор: Нұрбек Балгүл Қайрошқызы