2023 жылға дейін еліміздің барлық өңірінде цифрлық телерадио хабарлары таратылады. Бұл туралы Үкімет отырысында Ақпарат және қоғамдық даму министрі Асқар Омаров мәлімдеді. Оның дерегінше, бүгінде сандық эфирмен ел халқының 90% астамы қамтылған. Яғни, қазір бұл тың үрдіс 11 аймақта жүзеге асырылған. Ал, қалған 6 өңірді алдағы жылға дейін толық көшіру жоспарланып отыр. Осы мақсатта биыл Шығыс Қазақстанда 6 радиотелевизиялық станция пайдалануға беріледі. Нәтижесінде аймақтық және республикалық маңызы бар қалаларда 30, ал облыс орталығынан тыс елді мекендерде 15-ке дейін телеарнаны трансляциялауға мүмкіндік болады. Министр бұл орайда отандық телеөнімдерге жергілікті аудиториямен қатар шетелдіктер тарапынан қызығушылық артып келетінін тиілге тиек етті.
Асқар Омаров, ҚР ақпарат және қоғамдық даму министрі:
– 2021 жылы 166 телеарнаның ТОП-10-на 6 қазақстандық телеарна, оның ішінде 3 мемлекеттік телеарна кірді. Соңғы 5 жылда мемлекеттің қолдауымен 3500-ден астам сериядан тұратын 250-ге жуық сериал түсірілді. Олардың 50-ден астамы Сингапур, Ресей, Түркия, Өзбекстан, Қырғызстан және тағы басқа елдерге сатылды.
Авторы: Жеңіс Ермұқанов
