Қозоғистоннинг энг моҳир бургутчиси аниқланди. Туркистон вилоятида ёшлар ўртасида XVI Қушбегилик республика чемпионати ўтказилди. Беллашувларда 70 нафар спортчи қатнашди. Улар қаторида бир нафар қиз ҳам бор. Аяжан Даниярқизи ўзи билан Алтин ва Арин лақабли бургутларини олиб келди.
Аяжан Даниярқизи, бургутчи:
– Бу қушнинг вазни катта, уни бошқариш, қўлда тутиш осон эмас. Ким нима деса, десин, лекин йигитлар қизлардан бақувват. Елкаларим, қўлларим оғриб кетарди. Ҳозир бунга кўникиб қолганман.
Анъанавий беллашувлар 3 кун давом этди. Бир қанча турлардан иборат бўлди. Олдинига лочин ва қирғийлар учирилди, эгаси чақирганда қўлга қўниши баҳоланди. Сўнгра йиртқич қушларнинг навбати билан учирилиши, буйруққа кўра ўлжасига ташланиши кўриб чиқилди. Иштирокчилар таъкидлашича, бундай спорт билан шуғулланаётганлар сони йил сайин ортиб боряпти.
Бағдат Муптекеқизи, Қушбегилик республика федерациясивице-президенти:
– Авваллари бургутчилар ўртасида энг ёши кичиклари 60 ёшлар атрофида бўларди, 90 ёшлилари ҳам учрарди. Мамлакатда бу иш билан шуғулланадиганлар сони жами 20 нафардан ошмасди. Овга асосан бургут олиб чиқиларди. Ҳозир эса беллашувларга келаётганларнинг 80-90 фоизини ёшлар ташкил қилади, улар турли йиртқич қушлар, шу жумладан, лочин, қирғийларни парваришлайди.
Абдумалик Сарманов таржимаси
Ўхшаш янгиликлар
