Нұр-Сұлтан, Шымкент, Қарағанды және Атырау облыстарында карантиндік шектеулер күшейтіледі. Бұл аймақтарда эпидемиологиялық ахуал тұрақсыз. Анықталған деректердің жартысынан көбі осы өңірлерге тиесілі. Осыған байланысты 4 өңірде демалыс күндері «Ashyq» бағдарламасына қарамастан, қоғамдық көліктердің, сауда үйлерінің, базарлардың, спорт нысандарының, кинотеатрлардың жұмысы тоқтатылды. Ал кафе мен мейрамханалар тек жеткізу бойынша ғана жұмыс істейді. Жұмыс күндері «Ashyq» коды орнатылған мекемелердің есігі 20-00, қосымшаны пайдаланбайтындарда 17-00 дейін ашық. Сонымен бірге барлық ұйымдардағы қызметкерлердің 80% екпе салдырғандар мен соңғы 3 айда инфекциядан жазылып шықпағандарды қоспағанда, қашықтан жұмыс істеу режиміне жіберіледі.
Өз кезегінде Алексей Цой Қазақстанда тамыз айында коронавирус инфекциясын жұқтыру дерегі арта түседі деген болжам айтып отыр. Ол эпидемиологиялық жағдайға байланысты 3 мүмкін сценарийді жариялады. Елде дельта штамның белсенді таралуы мен вакциналаудың қазіргі қарқынын ескере отырып, пессимистік сценарий бойынша келесі айда жұқтыру дерегі орташа есеппен тәулігіне 6 мың жағдайдан жоғары болуы мүмкін. Бұл жағдайда вирус расталған адамдардың жалпы саны шілдеден қыркүйекке дейін шамамен 400 мың адамды құрайды. Ал оптимистік сценарий бойынша, күніне 5 мыңға жуық жағдай анықталуы мүмкін.
