Қазақстан халықаралық интернет-трафик транзитін кеңейтуге ниетті

Қазақстан халықаралық интернет-трафик транзитін кеңейтуге ниетті. Бүгінде осы үрдістегі еліміздің үлесі 1,5% құрайды. Ал, 2027-ші жылға қарай бұл көрсеткішті 5% дейін жеткізу көзделіп отыр. Олар халықаралық түйісу нүктелерінің өткізу қабілетін жартысынан астамға арттыруға бағытталған. Бұл ретте Каспий теңізінің түбі арқылы талшықты-оптикалық байланыс желісін салу және жалпы ұзындығы 4 мың шақырымнан асатын «Батыс–Шығыс» гипермагистралін жүзеге асыру жобалары бар. Цифрлық экожүйенің маңызды бөлігі - деректерді өңдеу орталықтары. Қазір ел аумағында екі мемлекеттік және 14 өңірлік орталық жұмыс істейді. Алдағы 5 жылда бұл қатарға тағы 9-ын қосу межеленген. Сонымен қатар, Қазақстан озық технологияларды жаппай ендірудің арқасында спутниктік байланыс бойынша цифрлық хабқа айналып келеді. Алдағы екі жылда халық аз қоныстанған бес жүзден астам ауылда спутниктік интернет пайда болады. Бұған қоса, 2026-шы жылы Direct-to-Cell қызметін іске қосу жоспарланған. Ол шалғай өңірлерді қоса алғанда, еліміздің барлық аумағын ұялы байланыспен қамтамасыз етпек. Айта кетейік, үш жыл ішінде телекоммуникация және байланыс саласына бір трлн теңгеден астам инвестиция бағытталды.

Жаслан Мәдиев, ҚР Премьер-Министрінің орынбасары, Жасанды интеллект және цифрлық даму министрі:

- Ағымдағы жылы интернет трафигін тұтыну айтарлықтай артқанын атап өту қажет. Оның өткен жылмен салыстырғанда екі есе көп болатыны күтілуде. Саланы дамыту 2024–2027 жылдарға арналған «Қолжетімді интернет» ұлттық жобасы аясында іске асырылуда. 2027 жылдың соңына дейін халықтың 100%-ы интернетпен қамтылады. Интернет жылдамдығы 100 Мбит/с-тан асып, оптикалық байланыс желілері ауылдық елді мекендердің 90%-ына дейін тартылады.

Веб-редактор: Нұрбек Балгүл Қайрошқызы