1984 жылы Әбілхан Қастеевтің есімі берілген еліміздің басты көркемсурет мұражайы биыл 85 жылдық мерейтойын атап өтеді. Елімізде Қастеевтен басқа да дарынды суретшілер болды. Бірақ, Қазақстанның негізгі өнер мұражайы сол кісінің атымен аталады. Неліктен? Қазақстанның бейнелеу өнерінің қалыптасуында Әбілхан Қастеевтің ролі неге соншалықты маңызды?
Әбілхан Қастеев шығармашылық жолын бастағанда, қазақ даласында сурет салу, бейнелеу өнері болған емес. 1904 жылы Шежін ауылында туған Әбілхан Қастеев те бала кезінен қолөнерге бейім болған екен. Анасы сырмақ салып, кілем тоқуға шебер адам болған деседі. Кішкентайынан шығармашылыққа әуес болған суретші әктастан, ағаш пен темірден түрлі заттар жасап, мектепке баратын балаларға үлестіретін. Орнына қағаз бен қалам алады екен. Осыдан-ақ, бала Әбілханның бейнелеу өнеріне ден қоя бастағанын көруге болады.
