Қазақстанда 2021 жылы ішкі туристер саны 6,9 млн болды. Бұл алдыңғы жылдармен салыстырғанда рекордтық көрсеткіш. Экотуризмді дамыту жөніндегі кеңесте мәдениет және спорт вице-министрі Ержан Еркінбаев осылай мәлімдеді. Сондай-ақ жыл соңына дейін республикаға 700 мыңға жуық шетелдік турист келеді деп күтілуде.
«28 елмен 107 бағыт бойынша халықаралық қатынастар қалпына келтірілді, сондай-ақ 77 елдің азаматтары үшін визасыз режим қалпына келтірілді. 2021 жылдың қорытындысы бойынша ұлттық парктерге барушылар саны 1,5 млн адам болды. 2022 жылдың соңына дейін ұлттық парктерге келушілердің санын 1,6 млн-ға дейін арттыру жоспарланып отыр»,- деп атап айтты вице-министр.
Айта кету керек, салалық мекеме жыл соңына дейін ішкі туризмге инвестицияларды 708 млрд теңгеге дейін ұлғайтуды жоспарлап отыр. 31 мыңнан астам адам туризм саласына жұмысқа тартылған. Шетелдік туристер үшін туроператорларды субсидиялау, балалар әуе билетінің құнын өтеу, тау шаңғысы жабдықтары мен туравтобустарды сатып алу, туристік және жол бойындағы қызмет көрсету нысандарына кеткен шығынды өтеп беру бойынша мемлекеттік қолдау шаралары жүзеге асырылуда. Ішкі туризмді ілгерілету үшін NeoNomad акциялары ұйымдастырылып жатыр, ол ішкі туристерді еліміздің 20 өңірін аралауға ынталандырады.
Түрген шатқалында туристерге арналған визит- орталық ашылды
Сондай-ақ туристерге арналған жаңа визит-орталықтарының саны артып келеді. Заманауи үлгідегі орталықта жергілікті саяхатшылар мен шетелдік меймандар ұлттық парктің қызметі туралы барлық қажетті ақпаратты ала алады. Сондай-ақ «Turgensai» кешенінде дәріс залы, кәдесый дүкені, тамақтану орны мен ойын алаңы жұмыс істейді. Осылайша саяхатшылардың алаңсыз тынығуына барлық жағдай жасалған. Мұндай орталықтар алдағы күндері – Алтынемел мен Шарын ұлттық парктерінде ашылады деп жоспарланып отыр.
Веб-редактор: Admin
Сондай-ақ
